JAPONIAR MERKATUAN BIDE EGITEN

Hogei urte bete ditugun honetan, aurrera pausu bat eman nahi izan dugu (erraldoi baten neurrikoa), nazioarteko merkatu berrien bila, eta Japoniara bidaia egin dugu Maisor produktuak han ezagutzera emateko, CAPRICE “Fancy the European appetizer” programaren eskutik; horren helburua da europar kultura eta tradiziotik eratorritako produktuak ezagutzera ematea, Hazi, Eusko Jaurlaritzaren landa, itsasertz eta elikagaien sustapenerako korporazioaren eskutik, Europar Batasunaren laguntzaz.

fancy-1024x733

 

Euskal Herriko elikagaien sustapenerako programa honek proposatzen du “kalitatezko gastronomiaz gozatu bitartean, denbora, espazioa eta esperientziak partekatzera gonbidatzen duen kultur tradizioa ezagutzera ematea” eta hamaiketakoa aurkezten du, bazkariaren aurretik, kalitatezko produktuak errazio txikitan jateko abagune bezala; etxean edo kalean gozatzeko, une aproposa da egunerokotasunetik atera eta gizarteratzeko, jateko gogoa pizten den bitartean. Hemen hain gurea dugun ohitura hori gure zaporeak urrutira erabateko bide gisa baliatu dugu orain. Japonia da estrategia horrek helburu dituen merkatuetako bat; akzio plan bat ondu da herrialde hartan elikagaiak merkaturatzeaz arduratzen diren eragileei gure herriko kalitatezko produktuen aukeraketa bat ezagutzera emateko.

IMG_1582

 

Testuinguru horretan, plan horren lehenbiziko urratsa zen Tokiora eraman gaituen bidaia hau. Basque Culinary Center-en laguntzarekin, euskal gastronomiaren ezaugarri diren zaporeak eraman ditugu Japoniara: AntxoaEuskal Herriko Kantauri Itsasoko Hegaluzea, Ibarrako Piparra eta Txakolia; jaki horiek gurean oso lotuak daude araurik gabe erlaxatzeko hain aproposa izanik, zapore, usain, uki eta forma berriekin esperimentatzeko aukera eskaintzen duen momentu horrekin.

Maisor Tokion

Bi hamarkadetan zehar bertako merkatuan jardun dugu batez ere; hala ere, krisia heldu zenean haratago begiratu eta frantziar merkatuan kokatu aldera lanari ekin genion. Orain sortalderuntz abiatu gara gure produktu nagusiena, hots, Kantauri Itsasoko Antxoa bertan zabaltzeko; artisau teknikak erabiliz itsasertzean bertan egindako mokadu goxo hori oso mirestua da bere usain biziagatik, bere uki eta haragiagatik eta baita digeritzeko erraza delako, bitaminatan, gatz mineraletan eta koipe aseetan aberatsa izatearekin batera.

IMG_1482_2

 

Eta egingo ziguten harrerarekiko itxaropentsu eta ilusioz beteta heldu ginen Japoniara, oso arrain zaleak baitira japoniarrak eta erruz balioesten baitutuzte artisau erara prestatutako kontserbak. Izan ere, munduko gizarte osasuntsuenetako bat dira eta bizi-itxaropen luzeenetarikoa da eurena; neurri handi batean elikadurarekin lotua dago osasun maila hori: laboreak, arraina, sojatik eratorritako produktuak eta koipe aseturik gabekoak oinarrizkoak dituzte.

IMG_1570

 

Gauzak horrela, Tokion showroom delako batean esku hartu genuen, gure produktuak inportatzaileei eta ostalaritzako profesionalei, HORECA (gaztelaniaz, hotelak, jatetxeak eta kafetegiak hitzen akronimoa) ildoko profesionalei, alegia, ezagutzera emateko. Helburu bera izan zuen Eneko Tokio jatetxean egin zen negozio afariak; Eneko izena bere buru den Eneko Atxarengandik datorkio; hiru Michelin izarren jabe den Azurmendi jatetxearen buruak 2017an ireki zuen jatetxea japoniar hiriburuan. Bilera hori bertako profesionalekin harremanak hestutzeko baliatu genuen.

 Bacalao ahumado con pimiento y guindilla-786    Shitaki con anchoa-239

 

Topaketa horiek antolatzeaz gain, Basque Culinary Center-ek euskal zein japoniar sukaldeak uztartzen dituzten hogeita hamar errezeta diseinatu ditu, japoniar kontsumitzaileek ikus dezaten euren errezeta liburu tradizionalean gure produktuak nola erabili; errezeta horiek liburu batean bildu dituzte. Plater horien artean dauzkagu Kantauri Itsasoko Hegaluzea umeboshiarekin egindako olio-ozpin saltsarekin; hegaluzea luzoker entsaladarekin edo daikon eta wakamerekin; Kantauri Itsasoko Antxoa marinatutako shiitakearekin, Kantauriko Antxoarekin egindako daikon nigiria eta abar.

Jarraian ikusi dezakezue errezeta liburu hori:

Errezeta liburua – gazteleraz

Errezeta liburua – japonieraz 

Errezeta liburua – ingelesez 

Tokiotik Osakara

IMG_2555         IMG_2610

Japoniar hiriburuan hainbat lan jardunaldiren ostean, Osakara bidaia egin genuen. Biztanleriari dagokionez herrialdeko bigarrena den hiri hori Japoniako “gastronomiaren hiriburu”tzat jotzen dute. Han Yoshitsigu Yamamotoren Alarde jatetxean izan ginen. Ezaguna egiten al zaizu bere izena? Behar bada ez, baina ziur iaz Keler garagardoaren iragarkian ikusi zenuela michelin izarra duen chef hau, Hondarribiko bere lagunek Yoshi izenez ezagutzen dutena. Yoshi sukaldari hendiengandik ikasteko asmoz etorri zen euskal Herrira, gerora Japonian bere jatetxeko sukaldeburu bihurtzeko asmoz. Hala ere, iritsi eta berehala bere aurreikuspenak aldarazi zizkion zerbait topatu zuen: lankideek pintxoak jatera eraman zuten eta orduantxe jabetu zen Donostiako goi mailako gastronomia tabernatan zegoenaz. Esperientzia hain izan zen itzela non hiru hilabeteko praktika hiru urteko egonaldia bihurtu zen; urte horietan egun Osakako bere jatetxean eskaintzen duen ezagutza eskerga bereganatu zuen. Oinarri gisa Japoniako produktuak erabilita egindako euskal sukaldaritza da Yohik bere bezeroei prestatzen diena. Arraina, haragia, … dena da bertakoa, eta hori izugarri gustatu zitzaigun!

IMG_2588

 

Gaua oroimenean gordeta geratzen diren bizipen horietakoa bilakatu zen: Maisor antxoak eraman genizkion opari eta berak esan zigun ezagutzen zuela gure obradorea, ez zela gure produktuak dastatzen zituen lehenbiziko aldia. Ziztu bizian antxoekin pintxo bana prestatu zigun bezero bakoitzari (hamahiru bat pertsona geunden jatetxean afaltzen) eta horiek banatzerakoan bezero bakitzara azaldu zion guk eramandako antxoak zirela, guk geuk era tradizionalean egindakoak. Eta, harrigarria badirudi ere, are gehiago Michelin izardun jatetxea kontuan izanda, chefak berak egiten du jatetxean egin beharreko oro: bezeroi harrera egin, edariak zerbitzatu, janaria prestatu, platerak atera eta horien inguruko azalpenak eman, kafeak egin eta baita kobratu ere! Jatetxean ez dago Yoshi eta bere bezeroez gain beste inor. Miresgarria da benetan.

… Eta Japoniatik Euskal Herrira

Jada etxean bueltan gaudela, dena prest dugu sektoreko japoniar komertzializatzaileek eta beste hainbat profesionalek Getariko portuko gure obradorera egingo duten bisitarako. Alderantzizko norabidean egingo duten bidaia horri esker, gure kontserbak, modu tradizionalean, artisau eran nola prestatzen ditugun gertutik ezagutzeko aukera izango dute. Gure gonbidatzaileek gu hartzerakoan erakutsitako omotenashi edo japoniar hopitalitate tradizionalari erantzuteko unea ere izango da.